காதல் கணவன் 115

Sevanthi durai

நிகரில்லா வானவில் எழுத்தாளர்
Staff member
"கருவை நீங்க கலைச்சிங்களா.? ஆனா ஏன்.? அந்த கருவை கலைச்சதால இங்கே எவ்வளவு பிரச்சனை தெரியுமா.? ஒன்னரை வருசமா எத்தனை குழப்பம் தெரியுங்களா.?" ஆத்திரத்தில் கத்தினான் வெற்றி.

ரேகா தன் அருகில் இருந்த நர்ஸை பார்த்தாள். "போலிஸ்க்கு போன் பண்ணுங்க.. மனநலம் சரியில்லாத பொண்ணை ஏமாத்தி கல்யாணம் பண்ணி கர்ப்பமாக்கி இருக்காருன்னு இவர் மேல கேஸ் எழுத சொல்லுங்க. இந்த பொண்ணு செத்ததும் கொலை கேஸையும் இவர் மேலேயே எழுத சொல்லுங்க.." என்றாள்.

சுற்றிருந்தவர்கள் திகைத்தனர்.

"மனநலம் சரியில்லையா.? என்ன பேசுறிங்க நீங்க.?" கோபத்தோடு ரேகாவை நெருங்கினான் வெற்றி.

"பின்ன இவ என்ன நார்மல் பொண்ணா.? இவளோட அப்பா அம்மா எங்கே.? 'எல்லாம் நான் பார்த்துக்கறேன் டாக்டர்'ன்னு சொன்னாளே இவளோட தங்கச்சி அவ எங்கே.?" என்று கேட்டாள் ரேகா.

"தங்கச்சியா.? அது என்ன புது கதை.?" என்ற வெற்றியை ஓரம் தள்ளினான் பாலாஜி.

"டாக்டர் மேடம். எங்கேயோ ஏதோ குழப்பம். தயவு செஞ்சி விளக்கமா சொல்றிங்களா.? இவ கர்ப்பத்தை ஏன் கலைச்சிங்க.? அதுக்கு முன்னாடி இவளை பிரசவ வார்டுக்கு அனுப்பிடுங்க. ரொம்ப வலியா இருக்கா.." என்றான்.

ரேகா நர்ஸிடம் சைகை காட்டினாள். "குழந்தையை மட்டுமாவது உயிரோடு காப்பாத்திடுங்க.." என்றாள்.

வெற்றிக்கு கோபமாக வந்தது அவள் சொன்னது கேட்டு.

"என் அம்முவுக்கு ஏதாவது ஆச்சின்னா உங்களை சும்மா விட மாட்டேன்.." என்றான்.

நகர்ந்துக் கொண்டிருந்த ஸ்டெச்சரை நிறுத்தினாள் ரேகா. "அப்படின்னா இப்பவே வேற ஹாஸ்பிட்டல் கூட்டிப் போங்க.." என்றாள்.

"நீ கொஞ்சம் சும்மா இருடா.." வெற்றியை அடக்கினார் தாத்தா.

"ப்ளீஸ் மேம்.. எப்படியாவது தாயையும் பிள்ளையையும் காப்பாத்தி கொடுங்க.." என்று கெஞ்சினார் தியாகராஜன்.

"சண்முகா மேமை கவனிக்க சொல்லுங்க.. செக்கப் பண்ணிட்டு தகவல் சொல்லுங்க.." என்று நர்ஸிடம் சொல்லி அனுப்பினாள் ரேகா.

ஸ்ட்ரெச்சரை உள்ளே தள்ளிக் கொண்டு போனார்கள்.

"அம்ருதாவை உங்களுக்கு எப்படி தெரியும் டாக்டர்.? ஏன் அவ குழந்தையை கலைச்சிங்க.?" வெற்றி கோபம் குறையாமல் கேட்டான்.

"பெரிய கதை. என் ரூமுக்கு போகலாமா.? நான் இப்பதான் ஒரு பிரசவம் பார்த்துட்டு வந்தேன். ரொம்ப நேரம் நிற்கறது கரெக்ட் கிடையாது.."

அவளது கன்சல்டிங் அறைக்கு சென்றார்கள்.

"அவளோட அம்மா எங்கே.?"

"வந்துட்டு இருக்காங்க.." என்றாள் தேன்மொழி. அதே நேரத்தில் தேன்மொழியின் கைபேசி ஒலித்தது. கைபேசியோடு வெளியே போனவள் சற்று நேரத்தில் அம்ருதாவின் பிறந்து வீட்டு ஆட்களோடு உள்ளே நுழைந்தாள்.

"ஒன்னரை வருசம் முன்னாடி வயித்துல பயங்கர வலி, ப்ளீடிங்கா இருக்குன்னு என்கிட்ட வந்தா இந்த பொண்ணு. செக் பண்ணதுல கர்ப்பப்பையிலும், கருப்பை வாயிலும், பிறப்புறுப்பு வரையிலுமே அடிப்பட்டு இருப்பதை கண்டுபிடிச்சோம். இந்த லட்சணத்துல அந்த பொண்ணு பிரகனென்ட் வேற. விசாரிச்சதுல அவளோட லவ்வர் அவளை கீழே தள்ளியிருக்கார்ன்னும் அதனால இப்படி அடி பட்டிருக்குன்னும் தெரிஞ்சது.." என்று வெற்றியை பார்த்தாள்.

வெற்றியின் முகத்தில் இரத்த ஓட்டமே இல்லை. சுற்றி இருந்த குடும்பத்தார் அவனை சந்தேகமாக பார்த்தனர். மேகலா தன் மருமகனை அதிர்ச்சியோடு பார்த்தாள்.

"ஆனா எங்களுக்கு இதை பத்தி எதுவும் தெரியாது டாக்டர். அவ கம்ப்ளீட்டா நார்மலா இருந்தா.." என்றாள் மேகலா.

"இருந்தாளா.? நடிச்சாளான்னு இன்னும் கொஞ்ச நேரத்துல ரிப்போர்ட்ல சொல்லிடுவாங்க.." என்றாள் ரேகா கசந்த நகைப்போடு.

"முதல்ல பழைய விசயத்தை முடிச்சிடலாம்.." என்றவள் "அந்த கரு வளரும் அளவுக்கு சூழ்நிலை இல்ல. சுக பிரசவம், சிசேரியன் நடக்காது. கருப்பையோட உள் சுவர்லயும் வெளி சுவர்லயும் பயங்கர காயம். இதனால அவளோட கர்ப்பப்பையில் ரொம்ப சேதாரம் ஆகிடுச்சி. அவ அந்த குழந்தையை பெத்துக்க நினைச்சா அவ செத்துடுவா. அந்த அளவுக்கு ரிஸ்கியானது அந்த கர்ப்பம். இந்த குழந்தையை அழிச்சிட சொல்லி நான்தான் கட்டாயப்படுத்தினேன். சின்ன பொண்ணு அவ. அவளோட உயிரோடு விளையாட நான் விரும்பல. அதே போல அந்த கர்ப்பப்பையையும் அவளால தன் உடம்புக்குள்ள வச்சிருக்கவே முடியாது. அவ முடிஞ்ச அளவுக்கு சீக்கிரமா அதை நீக்கியாகணும். ஆனா அவ எல்லாத்துக்கும் நோ தான் சொன்னா.."

வெற்றியின் கண்களில் திரண்டு இருந்த கண்ணீர் இமைகளை தாண்டியது. அறையில் ஓசையே இல்லை. அனைவரும் வெற்றியை கோபத்தோடு வெறித்துக் கொண்டிருந்தனர்.

"அவ இந்த விசயம் கேட்டதுல இருந்து மென்டலா பாதிக்கப்பட்டுட்டா. கை நடுங்க உனக்கு போன் பண்ணா.." என்று வெற்றியை கை நீட்டி சொன்னாள் ரேகா.

வெற்றி சிலையாக நின்றிருந்தான்.

"ஒரு முறை இரண்டு முறை இல்ல. எனக்கு தெரிஞ்சி ஒரு மணி நேரமா தொடர்ந்து உனக்கு மட்டும்தான் போன் பண்ணிட்டு இருந்தா. உன் அம்மாவுக்கு பண்ணுன்னு நான் சொன்னேன். ஆனா அவ உனக்கு மட்டும்தான் பண்ணா. அவ அம்மாவை விடவும் அந்த டைம்க்கு நீதான் தேவைப்பட்டிருக்க அவளுக்கு.."

மேகலா முந்தானையால் வாயை பொத்தினாள்.

இதய துடிப்பின் வேகம் குறைந்துக் கொண்டிருந்தது வெற்றிக்கு. அன்றைய நாள் நினைவு இருக்கிறது. டிரெயினிங் சென்ற இடத்தில் அங்கிருந்தவர்களோடு சேர்ந்து பார்டிக்கு சென்றிருந்தான். அவள் அழைப்பதை பார்த்தான். ஆனால் தன் காதலிதானே,‌ பிறகு அழைக்கலாம் என்ற அதே பழைய அலட்சியத்தோடு போனை சைலன்டில் போட்டு விட்டு தனது வேலையை‌ பார்க்க ஆரம்பித்தான்.

"ஒரு மணி நேரம் கழிஞ்சது. அந்த குழந்தையை கலைச்சிடுன்னு மீண்டும் சொன்னேன். அவ லேட் பண்ண பண்ண கருப்பையோட சேதாரம் அதிகமாகிட்டே போகும். ஒரு நாள் தாமதமும் பெரிய ஆபத்தை கொண்டு வந்து விட்டுடும். பச்சை ரணம். அவளுக்கான ரத்த போக்கு கூட அப்ப அதிகமாதான் இருந்தது.."

வெற்றிக்கு கரங்கள் நடுங்கியது. தலைக்குள், மூளையை பாதுகாக்கும் மண்டை ஓட்டின் உள்ளே என்னவோ பூச்சியும் பூரானும் ஓடியது.

நடுங்கிய மனைவியை தோளோடு அணைத்துக் கொண்டார் ராமன்.

அழுதுக் கொண்டிருந்தாள். சத்தம் வெளியே வராத அளவுக்கு வாயை பொத்தி அழுதுக் கொண்டிருந்தாள் மேகலா.

"யோசிக்கிறேன்னு வெளியே போனா. அந்த டைம்க்கு அவளோட சிஸ்டர் வந்துட்டா. என்னாச்சின்னு கேட்டவக்கிட்ட விசயத்தை சொன்னேன்.‌ 'குழந்தையை கலைச்சிடுங்க. ஆனா கர்ப்பப்பையை எடுக்காம அதை சரி பண்ண வேற வழி இருக்கா டாக்டர்'ன்னு கேட்டா. 'அவ கரு வீக் இல்ல. ஆனா கருப்பைதான் சேதாரம். கருவை கலைச்சாலும் இனி எப்பவும் அவளால குழந்தை பெத்துக்க முடியாது. குறைஞ்சபட்சம் ஒரு வருசத்துக்காவது செக்ஸ்ங்கறது அவளுக்கு பாசிபில் இல்ல.. அதையும் மீறி அவ எதையாவது டிரை பண்ணா கண்டிப்பா செத்துடுவா'ன்னு சொன்னேன்."

வெற்றியால் அதற்கு மேல் நிற்க கூட முடியவில்லை. அங்கிருந்த ஒற்றை இருக்கையில் அமர்ந்தான்.

'என்னாலயா.? என் அம்முவுக்கு என்னால அவ்வளவு பிரச்சனையா.?' உள்ளங்கைகளிலும் உள்ளங்கால்களிலும் வியர்த்தது.

"அவளுக்கு சிஸ்டர்ன்னு யாரும் இல்ல டாக்டர்.." என்றாள் மேகலா அழுகையோடு.

"எனக்கு என்னம்மா தெரியும்..? அவதான் அந்த பொண்ணோடு இருந்தா. 'அவ சாக வேணாம் டாக்டர். குழந்தையை கலைச்சிடுங்க'ன்னு சொன்னதும் அவதான். அதுக்கு கையெழுத்து போட்டதும் அவதான். அப்புறம் அவளேதான் அந்த பொண்ணுக்கிட்ட பேசினா. 'அவ முடியாதுன்னு சொல்றா. நீங்க மயக்க ஊசி‌ போட்டு கருவை மட்டும் கலைச்சிடுங்க'ன்னு சொல்லிட்டா.‌ நான் அதன் பிறகும் அந்த பொண்ணோடு பேசினேன். ஒரு யூஸும் இல்ல. அந்த செய்தியால மனதளவில் பாதிக்கப்பட்டுட்டா.. 'நான் வாழவே கூடாது சாகணும்'ன்னு ஒரு முறை சொன்னா. 'வெற்றியை கொல்லணும்.. என் வாழ்க்கையையே அழிச்சிட்டான்'னு ஒரு முறை அழுதா. 'நான் வெற்றியோட காதலுக்கு அருகதையா இல்லாதவளா போயிட்டேன்'னு அழுதா.. 'இனி அவன் முகத்துல எப்படி விழிப்பேன்,‌ அவன் என்னை வேணாம்ன்னு சொல்லிடுவான்'னு புலம்பினா. அந்த டைம்ல அவளை பார்க்கணுமே. அழுகையும் புலம்பலும். 'நான் என் குழந்தையை அழிக்க மாட்டேன். இது என் குழந்தை.. இதை அழிச்சா என் வெற்றி என்னை கொன்னுடுவான். அவனோட கோபத்தையும் வெறுப்பையும் என்னால தாங்க முடியாது. அதுக்கு பதிலா நான் செத்தே போகலாம். குழந்தையை கலைச்சிட்டு வாழுறதுக்கு பதிலா குழந்தையை வயித்துல வச்சிக்கிட்டே சாகறேன் நான்'னு ஒரு அழுகை.."

தரையை‌ பார்த்து உட்கார்ந்திருந்தவன் நிமிர்ந்தான். "அந்த குழந்தையை உடனே கலைச்சிருக்கலாமே.!" என்றான்.

"அப்கோர்ஸ். அதைதான் செஞ்சேன் நான். அவளுக்கு மெண்டல். அதுக்காக நான் அவ உயிரோடு ‌விளையாட முடியுமா.? பைத்தியம் பிடிச்ச மாதிரி உட்கார்ந்துட்டு இருந்த பொண்ணுக்கு மயக்க ஊசி போட்டுதான் கலைச்சேன் நான். மயக்கம் தெளிஞ்ச பிறகும் அவளுக்கு ஒரே அழுகை.. உயிரை காப்பாத்ததான் இப்படி பண்ணேன்னு அவளுக்கு புரியல. அப்பவும் கூட ப்ளீடிங் நிற்கவே இல்ல. இப்படியே இருந்தா இன்னும் ஒரு வாரத்துல கர்ப்பப்பையை எடுத்தே ஆகணும்ன்னு சொல்லிட்டேன்.. மனநல மருத்துவர் மங்கைக்கிட்டயும் அனுப்பி வச்சேன். அவங்கதான் செக் பண்ணிட்டு 'இந்த பொண்ணுக்கு மனநிலையில் பாதிப்பு ஏற்பட்டு இருக்கு. கண்டிப்பா அப்நார்மலா பிகேவ் பண்ணுவா. மூனு நாலு மாசமாவது ஹாஸ்பிட்டல்ல அட்மிட் பண்ணியாகணும்'ன்னு என்னையே பர்சனலா கூப்பிட்டு சொன்னாங்க.."

"அவ அப்நார்மலா நடந்துக்கல டாக்டர். நல்லா இருந்தா.." ஆரவ் உடைந்த குரலில் சொன்னான்.

"இல்ல.. அப்நார்மலாதான் இருந்தா.. நான்தான் கவனிக்கல.." நெற்றியில் ஓங்கி அறைந்துக் கொண்டு சொன்னான் வெற்றி. தேன்மொழி அவசரமாக அவனருகில் ஓடிப் போய் நின்றாள். அவனின் கையை விலக்கினாள். அவனின் தலையை தன் இடுப்போடு சாய்த்துக் கொண்டாள்.

"அவளை உடனடியா மனநல மருத்துவமனையில அட்மிட் பண்ண முடியல. பிகாஸ் ஆப் ஹேர் பாடி ஹெல்த். ப்ளீடிங் நின்ன பிறகு ஸ்கேன் எடுத்து பார்த்து, கர்ப்பப்பையில் ஏதாவது மாற்றம் இருக்கான்னு செக் பண்ணிட்டு அதன்பிறகுதான் அவளை அட்மிட் பண்றதை பத்தி யோசிக்க முடியும்.. அதனாலதான் அன்னைக்கு டிஸ்சார்ஜ் செஞ்சோம் நாங்க. அவளோட தங்கச்சிக்கிட்ட ஒன்னுக்கு பத்து முறை தெளிவா சொல்லி அனுப்பினேன். எல்லாத்துக்கும் தலையை தலையை ஆட்டினா. ஆனா இப்ப இப்படியொரு நிலையில் கொண்டு வந்து நிற்க வச்சிருக்கா. அக்கா மேல கொஞ்சமும் பாசம் இல்லாம போயிருக்கு அந்த பொண்ணுக்கு.."

"காட்.. அவளுக்கு எந்த தங்கச்சியும் இல்ல டாக்டர்.." ராமன் அடக்க முடியாத வேதனையோடு சொன்னார்.

"சினேகா.. அவளாதான் இருக்கும்.." முனகினான் வெற்றி.

"ஆமா. அவதான். அந்த பேர்லதான் சைன் பண்ணா.." என்று ரேகா சொன்ன அதே நேரத்தில் அந்த அறைக்குள் நுழைந்தாள் சண்முகா.

நின்றிருந்த கூட்டத்தை பார்த்தவள் "வாட் இஸ் திஸ்.? எதுக்கு இவ்வளவு கூட்டம்.? அவசியத்துக்கு இரண்டு பேரை வச்சிட்டு மீதி பேரை வெளியே அனுப்ப மாட்டிங்களா.?" என்று எரிந்து விழுந்தபடி வந்து வெற்றிக்கு அருகில் இருந்த மற்றொரு இருக்கையில் அமர்ந்தாள்.

"ஹூ இஸ் தட் கேர்ள்.? எதுக்கு இப்படி ரிஸ்கான கேஸை உள்ளே சேர்த்துக்கிறிங்க.? நாளைக்கு ஹாஸ்பிட்டல் வாசல்ல போராட்டம் பண்ணுவாங்க. நம்மகிட்டயிருந்து காசு‌ பிடுங்க பார்ப்பாங்க.." வெறுப்போடு சொன்னாள் சண்முகா.

ரேகா பெருமூச்சு விட்டாள். "வேண்டிய பொண்ணு டாக்டர்.."

"அவளால முடியாது ரேகா. கரு உருவான உடனே அழிச்சிருக்கணும். அதுவும் இல்லாம இந்த பொண்ணு எப்படி செக்ஸ் வச்சிக்கிட்டான்னு சந்தேகமா இருக்கு.."

"அது செக்ஸ் இல்ல. ரேப்.." பற்களை கடித்தபடி சொன்னான் ஆரவ்.

அவனை ஏதோ ஜந்து போல திரும்பி பார்த்து விட்டு மீண்டும் ரேகாவிடம் திரும்பினாள் சண்முகா.

"வெஜைனாவுல இருந்து யூடரஸ் வரைக்கும் ஏதோ காயங்கள் பரவியிருக்கு.‌ யூடரஸ்ல ஏற்கனவே காயம் இருந்திருக்கணும். வைரஸ் இன்ஃபெக்ஷனால இப்ப முழுசா சேதாரம். உள் தோல் நார்மலா இல்ல. இந்த பொண்ணு இத்தனை நாள் எப்படி உயிரோடு இருந்தான்னு சந்தேகமாக இருக்கு.. இதுல ஒரே பாசிடிவ் மேட்டர் என்னன்னா குழந்தை ஹெல்தியா இருக்கு. ஆபரேட் பண்ணி எடுத்துடலாம். ஆனா.." பெருமூச்சு விட்டவள் "ஆபரேஷன் பண்ண அவளோட ஹஸ்பண்ட்கிட்டயும் அப்பாகிட்டயும் கையெழுத்து வாங்கிடு. ஹாஸ்பிட்டல் முன்னாடி நின்னு போராட்டம் பண்றது கூடவே கூடாதுன்னு கன்டிஷனா சொல்லிடு. அதுக்கு அவங்களுக்கு சம்மதம்ன்னா நான் ஆபரேஷன் ரூமுக்கு போறேன்.." என்றாள்.

அடுத்த அத்தியாயத்தில் சந்திக்கலாம் நட்புள்ளங்களே
 
Top
All rights reserved by nigarilaavanavil.com
Site Made with by SMMTN